ក្រសួងផែនការអាចនឹងផ្តល់បណ្ណសមធម៌ជូនពលរដ្ឋក្រីក្រប្រមាណ ៣០គ្រួសារនៅសហគមន៍ផ្លូវរថភ្លើង
- Admin Page
- July 27, 2022
- Views 171
ក្រសួងផែនការអាចនឹងផ្តល់បណ្ណសមធម៌ជូនពលរដ្ឋក្រីក្រប្រមាណ ៣០គ្រួសារនៅសហគមន៍ផ្លូវរថភ្លើង
ភ្នំពេញ៖ តាមការគ្រោងទុក ក្រសួងផែនការ អាចនឹងផ្តល់បណ្ណសមធម៌ជូនពលរដ្ឋក្រីក្រប្រមាណ៣០គ្រួសារ រស់នៅសហគមន៍ផ្លូវរថភ្លើង ក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។ ការគ្រោងផ្តល់បណ្ណនេះ ធ្វើឡើងបន្ទាប់ពីមន្រ្តីជំនាញនៃក្រសួង និងក្រុមប្រឹក្សាជាតិគាំពារសង្គម បានចុះពិនិត្យ និងវាយតម្លៃ ពីស្ថានភាពគ្រួសារទាំងអស់នោះ។
ឯកឧត្តម ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុម ប្រឹក្សាជាតិគាំពារសង្គម និងឯកឧត្ដម ថេង បញ្ញាធន ប្រតិភូរាជរដ្ឋាភិបាលទទួលជាអគ្គនាយកផែនការនៃក្រសួងផែនការ កាលពីថ្ងៃទី២៦ ខែកក្កដាម្សិលមិញ បានដឹកនាំក្រុមការងារចុះសង្កេត និងពិនិត្យវាយតម្លៃដំណើរការ នៃការ ផ្តល់បណ្ណសមធម៌ និងការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុង ពេលប្រយុទ្ធនឹងជំងឺកូវីដ-១៩ នៅក្នុងសហគមន៍ផ្លូវរថភ្លើង ស្ថិតក្នុងសង្កាត់ទួលសង្កែ ខណ្ឌឫស្សីកែវ។
ឯកឧត្ដម ថេង បញ្ញាធន ប្រតិភូរាជរដ្ឋាភិបាល ទទួលជាអគ្គនាយកផែនការ នៃក្រសួងផែនការ បានឱ្យដឹងថា ការសង្កេត និងពិនិត្យវាយតម្លៃនៅសហគមន៍ផ្លូវរថភ្លើង ធ្វើឡើងបន្ទាប់ពីអាជ្ញាធរមូលដ្ឋាន ទទួលសំណើសុំបណ្ណក្រីក្រីពីសមាជិកសហគមន៍ជាបន្តបន្ទាប់បន្ថែមទៀត នៅពេលថ្មីៗនេះ។ ជាលទ្ធផលការចុះសង្កេតគឺពលរដ្ឋ២០-៣០គ្រួសារ ដែលអាចនឹងទទួលបានបណ្ណសមធម៌ ប៉ុន្តែចំនួននេះ អាចប្រែប្រួលទៅតាមការសម្ភាសន៍ជាក់ស្តែង។
ក្រៅពីនេះឯកឧត្តម បានអំពាវនាវដល់ពលរដ្ឋមួយចំនួន មិនមែន ជាពលរដ្ឋក្រីក្រ កុំចង់បានបណ្ណសមធម៌ ព្រោះបណ្ណនេះ ផ្តល់ជូនតែពលរដ្ឋក្រីក្រពិតប្រាដកប៉ុណ្ណោះ។
ឯកឧត្តម ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេ ខាធិការ ក្រុមប្រឹក្សាជាតិគាំពារសង្គម បានឱ្យដឹងថា គិតចាប់ពីថ្ងៃអនុវត្តកម្មវិធីជំនួយសង្គម ពីខែមិថុនា ឆ្នាំ២០២០ រហូតដល់ខែកក្កដា ឆ្នាំនេះ រាជរដ្ឋាភិបាល ចំណាយថវិកាក្នុងទំហំទឹកប្រាក់ជាង៧៤៤ លានដុល្លារ។
បើតាមរបាយការណ៍ពីក្រសួងផែនការ គិតត្រឹមខែកក្កដា ឆ្នាំ២០២២ គ្រួសារក្រីក្រនៅទូទាំងប្រទេសកម្ពុជា មានបណ្ណសមធម៌ ចំនួន៦៨៨,៨៤១គ្រួសារ ដែលមានសមាជិកសរុបចំនួនជាង២,៧លាន នាក់ បាននិងកំពុងទទួលការឧបត្ថម្ភពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩៕អត្ថបទ៖ ទូច សោភ័ណ