Harry Maguire មានបញ្ហាម្តងទៀត ខណៈអង់គ្លេស និងអាល្លឺម៉ង់ស្មើគ្នា ៣-៣ នៅ Wembley
- Admin Page
- September 27, 2022
- Views 292
Harry Maguire មានបញ្ហាម្តងទៀត ខណៈអង់គ្លេស និងអាល្លឺម៉ង់ស្មើគ្នា ៣-៣ នៅ Wembley
បាល់ទាត់៖ កំហុសពីរចំនុចសំខាន់ៗដោយកីឡាករ ២នាក់របស់អង់គ្លេសធ្វើឱ្យការប្រកួតទល់នឹងអាល្លឺម៉ង់បានបញ្ចប់ត្រឹមលទ្ធផលស្មើគ្នា ៣-៣ ក្នុងជំនួបនៃក្របខណ្ឌ UEFA Nations League។
បន្ទាប់ពីការប្រកួតវគ្គទី១ ដែលគ្មានគ្រាប់បាល់ វគ្គទី២ ខ្សែការពារ Manchester United, Harry Maguire ធ្វើឱ្យមានកំហុសបង្ករឱ្យមានគ្រាប់បាល់ដំបូង ក្រោយបញ្ជូនបាល់ឡើងមិនល្អ ហើយក៏ទាត់ជើង Jamal Musiala ក្នុងប្រអប់គ្រោះថ្នាក់ធ្វើឱ្យ Ilkay Gundogan ជាអ្នកស៊ុតបាល់ ១១ម៉ែត្រឱ្យអាល្លឺម៉ង់នាំមុខមុន។ ខ្សែប្រយុទ្ធ Chelsea, Kai Havertz ជាអ្នកបន្ថែមការនាំមុខ ២-០ ឱ្យអាល្លឺម៉ង់មុនពេលដែល Luke Shaw ស៊ុតតាមពីក្រោយឱ្យអង់គ្លេសវិញ និង Mason Mount ស៊ុតតាមស្មើ ២-២ ត្រឹមនាទីទី៧៥។
អង់គ្លេសក៏មានឱកាសនាំមុខសារជាថ្មីដោយបាល់ពិន័យ ១១ម៉ែត្ររបស់ Harry Kane និងគួរតែជាគ្រាប់ជ័យជំនះទៅហើយ តែគ្រាប់តាមស្មើរបស់អាល្លឺម៉ង់ក៏កើតឡើង ដោយសារកំហុសចាប់បាល់មិនជាប់របស់អ្នកចាំទី Nick Pope ធ្វើឱ្យ Kai Havertz ស៊ុតតាមស្មើបានសំរេច ៣-៣។ លទ្ធផលនេះធ្វើឱ្យក្រុមទាំង២ បញ្ចប់ការប្រកួតក្នុងពូលដោយអាល្លឺម៉ង់លេខ៣ មាន ១០ពិន្ទុ និងអង់គ្លេសបាតពូលមានត្រឹម ៣ពិន្ទុ។ អ៊ីតាលីជាអ្នកឈ្នះក្នុងពូលមាន ១១ពិន្ទុឡើងវគ្គពាក់កណ្តាលផ្តាច់ព្រ័ត្រ ខណៈហុងគ្រីបានត្រឹមលេខ២ មាន ១០ពិន្ទុ៕
អត្ថបទ៖នាង សុភាវុធ