អ្នកនាំពាក្យក្រសួងមហាផ្ទៃ អះអាងថា ក្រសួងមិនបានបញ្ជាឲ្យអាជ្ញាធរមូលដ្ឋាន ចុះណែនាំ ឬធ្វើកិច្ចសន្យាចំពោះម្ចាស់តារាងបាល់ទះ និងពលរដ្ឋចិញ្ចឹមមាន់ជល់នៅផ្ទះទេ
- Admin Page
- October 07, 2022
- Views 369
អ្នកនាំពាក្យក្រសួងមហាផ្ទៃ អះអាងថា ក្រសួងមិនបានបញ្ជាឲ្យអាជ្ញាធរមូលដ្ឋាន ចុះណែនាំ ឬធ្វើកិច្ចសន្យាចំពោះម្ចាស់តារាងបាល់ទះ និងពលរដ្ឋចិញ្ចឹមមាន់ជល់នៅផ្ទះទេ
ភ្នំពេញ៖ អ្នកនាំពាក្យក្រសួងមហាផ្ទៃ លោក ខៀវ សុភ័ក បានឱ្យដឹងថា ក្រសួងមហាផ្ទៃ មិនបានបញ្ជាឲ្យអាជ្ញាធរមូលដ្ឋាន ចុះណែនាំ ឬធ្វើកិច្ចសន្យាចំពោះម្ចាស់តារាងបាល់ទះ និង ពលរដ្ឋចិញ្ចឹមមាន់ជល់នៅផ្ទះនោះឡើយ ខណៈថ្មីៗនេះ មានសមត្ថកិច្ចនៅតាមបណ្តាខេត្តមួយចំនួន ចុះអនុវត្តហាមប្រាមមិនឲ្យពលរដ្ឋបើកតារាងបាល់ទះ និងមិនឲ្យពលរដ្ឋចិញ្ចឹមមាន់ជល់នៅក្នុងភូមិដ្ឋាន។
ពាក់ព័ន្ធនឹងបញ្ហានេះ លោក ខៀវ សុភក័ បានឱ្យដឹងថា ក្នុងករណីសមត្ថកិច្ចឃើញពលរដ្ឋ ស្ពាយ ឬដឹកជញ្ជូនមាន់ ក្នុងគោលបំណងយកទៅជល់ជាល្បែងភ្នាល់នោះ សមត្ថកិច្ចមានសិទ្ធិក្នុងការអនុវត្តវិធានការដកហូត និងអប់រំណែនាំទៅតាមផ្លូវច្បាប់។ ចំពោះករណីសមត្ថកិច្ចចុះទៅបិទ និងណែនាំម្ចាស់តារាងបាល់ទះនាពេលកន្លងទៅនោះ ជាវិធានការរបស់ក្រសួងមហាផ្ទៃ តម្រូវឲ្យអាជ្ញាធរមូលដ្ឋាន ចុះអនុវត្តចំពោះតែម្ចាស់តារាងបាល់ទះ ដែលបើកឲ្យមានការភ្នាល់ជាលុយតែប៉ុនណ្ណោះ។ សម្រាប់តារាងបាល់ទះដែលបើកឲ្យពលរដ្ឋលេងដើម្បីសុខភាព គឺអនុញ្ញាតឲ្យបើកដំណើរការធម្មតា។ អាជ្ញាធរមូលដ្ឋាននៅតាមបណ្ដាខេត្តមួយចំនួន បានចុះទៅអប់រំណែនាំ និងធ្វើកិច្ចសន្យាឲ្យពលរដ្ឋបញ្ឈប់ការចិញ្ចឹមមាន់ និងបិទតារាងបាល់ទះមួយចំនួន ក្រោមហេតុផលថា មានបង្កប់ល្បែងភ្នាល់ខុសច្បាប់។
សូមបញ្ជាក់ថា អ្នកនាំពាក្យក្រសួងមហាផ្ទៃបានលេីកឡេីងដូចនេះ ធ្វើឡើងក្រោយបញ្ចប់កិច្ចប្រជុំស្តីពី លទ្ធផលនៃការអនុវត្តយុទ្ធនាការប្រចាំគ្រប់ទម្រង់ នៃអំពើជួញដូរមនុស្ស ជួញដូរពលកម្ម អាជីវកម្មផ្លូវភេទ និងល្បែងស៉ីសងខុសច្បាប់គ្រប់ប្រភេទ ព្រមទាំងការងារត្រួតពិនិត្យជនបរទេស និងហត្ថពលកម្មបរទេស ក្រោមវត្តមានសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាព្រឹកថ្ងៃទី៧ ខែតុលា ឆ្នាំ២០២២៕
អត្ថបទ៖ ម៉ៅ នរិទ្ធិយ៉ា