អាស៊ីអឺរ៉ុបឡើងជួបណាហ្គានៃពានសម្ដេចតេជោ-ថ្នាក់ជាតិ ក្រោយយកឈ្នះភ្នំពេញហ្គាឡាក់ស៊ីវិញ ៣-០
- Admin Page
- July 21, 2022
- Views 132
អាស៊ីអឺរ៉ុបឡើងជួបណាហ្គានៃពានសម្ដេចតេជោ-ថ្នាក់ជាតិ ក្រោយយកឈ្នះភ្នំពេញហ្គាឡាក់ស៊ីវិញ ៣-០
បាល់ទាត់៖ ទីបំផុតក្រុមបាល់ទាត់អាស៊ីអឺរ៉ុបបានទទួលកៅអីវគ្គ ១៦ក្រុមចុងក្រោយសម្រាប់ពានរង្វាន់សម្ដេចតេជោ ហ៊ុន សែន លើកទី១៦ (ថ្នាក់ជាតិ) ឆ្នាំ២០២២ ដោយត្រូវជួបក្រុមណាហ្គាវើលដ៏ បន្ទាប់ពីក្រុមសមាជិកលីគទី២ មួយនេះ បានយកឈ្នះក្រុមភ្នំពេញហ្គាឡាក់ស៊ីវិញដោយលទ្ធផល ៣-០ ក្នុងជំនួបកាត់សេចក្ដីជើងទី១ វគ្គជម្រុះថ្នាក់ជាតិនៅកីឡដ្ឋាន AEU Sport Park កាលពីល្ងាចថ្ងៃទី២០ ខែកក្កដាម្សិលមិញ។
បន្ទាប់ពីរងបរាជ័យក្រៅដី ២-១ កាលពីជើងទី១ អាស៊ីអឺរ៉ុបធ្វើបានយ៉ាងល្អក្នុងជំនួបជើងទី២ លើទឹកដីរបស់ខ្លួនដោយការពារមិនឲ្យមានគ្រាប់បាល់របូតឡើយ។ លើសពីនេះ ពួកគេបានស៊ុតបំប៉ោងសំណាញ់ទីក្រុមភ្នំពេញហ្គាឡាក់ស៊ី ៣គ្រាប់ដោយកីឡាករ ម៉ន កក្កដា ២គ្រាប់ និង ប៉ុក រ៉ូហ្សា ១គ្រាប់ដើម្បីធានាកៅអីវគ្គ ១៦ក្រុមចុងក្រោយទៀតផង បន្ទាប់ពីសរុបលទ្ធផលទាំង ២ជើង អាស៊ីអឺរ៉ុបឈ្នះក្រុមភ្នំពេញហ្គាឡាក់ស៊ី ៤-២។
សម្រាប់កការប្រកួតពានរង្វាន់សម្ដេចតេជោ-ថ្នាក់ជាតិ អាស៊ីអឺរ៉ុបនឹងត្រូវជួបជាមួយក្រុមឈរលេខរៀងទី៣ គិតត្រឹមសប្ដាហ៍ទី១១ នៃលីគកំពូលកម្ពុជាគឺក្រុមណាហ្គាវើលដ៏ដែលនឹងត្រូវជួបគ្នា ២ជើងដើម្បីស្វែងរកក្រុមខ្លាំងឡើងវគ្គបន្ដ ក្នុងនោះជើងទី១ គ្រោងប្រកួតនាថ្ងៃទី២៧ ខែកក្កដា ខណៈជើងទី២ ក្រុមទាំងពីរគ្រោងប្រកួតនាថ្ងៃទី២០ ខែសីហា ឆ្នាំ២០២២ ខាងមុខ៕
អត្ថបទ៖ លី ឈុនឡា
Copyright © 2024 Cambodia Live News. All rights reserved.
Address
Phnom Penh, Cambodia
Cambodia Live News ព័ត៌មានពិត សម្រាប់លោកអ្នក៕