ចិនព្រមានថា អាចនឹងឆ្លើយតបដោយយោធា ចំពោះដំណើរទស្សនកិច្ចរបស់ប្រធានសភាអាមេរិកទៅកោះតៃវ៉ាន់
- Admin Page
- July 27, 2022
- Views 172
ចិនព្រមានថា អាចនឹងឆ្លើយតបដោយយោធា ចំពោះដំណើរទស្សនកិច្ចរបស់ប្រធានសភាអាមេរិកទៅកោះតៃវ៉ាន់
ចិន៖ ចិនបានលើកឡើងកាលពីថ្ងៃអង្គារថា អាចនឹងមានការឆ្លើយតបដោយយោធា បើប្រធានសភាសហរដ្ឋអាមេរិកលោកស្រី Nancy Pelosi សម្រេចធ្វើដំណើរទស្សនកិច្ចទៅកាន់កោះតៃវ៉ាន់។
លោកវរសេនីយ៍ឯក Tan Kefei អ្នកនាំពាក្យក្រសួងការពារជាតិចិនបាននិយាយថា ប្រសិនបើលោកស្រី Pelosi ទៅទស្សនកិច្ចនៅកោះតៃវ៉ាន់មែននោះ នឹងបំពានយ៉ាងធ្ងន់ធ្ងរលើគោលនយោបាយចិនតែមួយ ប៉ះពាល់យ៉ាងខ្លាំងដល់អធិបតេយ្យភាព និងបូរណភាពទឹកដីរបស់ចិន និងប៉ះពាល់ធ្ងន់ធ្ងរដល់មូលដ្ឋានគ្រឹះនយោបាយនៃទំនាក់ទំនងចិន-អាមេរិក។ លោក Tan បាននិយាយថា ក្រុងប៉េកាំងបានជំរុញសហរដ្ឋអាមេរិកឲ្យចាត់វិធានការជាក់លាក់ ដើម្បីគាំទ្រដល់ការប្ដេជ្ញាចិត្តរបស់ខ្លួនបញ្ចៀសការគាំទ្រការប្រកាសឯករាជ្យរបស់កោះតៃវ៉ាន់ និងមិនត្រូវរៀបចំឲ្យមានដំណើររបស់លោកស្រី Pelosi ទៅកាន់តំបន់កោះតៃវ៉ាន់ឡើយ។ លោក Tan បានបន្ថែមថា បើសហរដ្ឋអាមេរិកនៅតែចចេសរឹងរូស យោធាចិននឹងមិននៅស្ងៀមឡើយ ហើយចិននឹងចាត់វិធានការម៉ឺងម៉ាត់ដើម្បីរារាំងការជ្រៀតជ្រែករបស់កម្លាំងខាងក្រៅ។
ប្រធានសភាអាមេរិករូបនេះបានគ្រោងទៅកាន់កោះតៃវ៉ាន់កាលពីខែមេសា ប៉ុន្តែបានលុបចោលវិញក្រោយធ្វើតេស្តវិជ្ជមានវីរុស COVID-19។ បច្ចុប្បន្នលោកស្រីគ្រោងនឹងធ្វើដំណើរទៅកោះតៃវ៉ាន់នៅខែសីហា ដែលត្រូវបានរាយការណ៍ដំបូងដោយសារព័ត៌មាន Financial Times។ ដំណើររបស់លោកស្រី Pelosi ទៅកាន់កោះតៃវ៉ាន់បាននាំឲ្យមានការជជែកដេញដោលនៅក្នុងទីក្រុង Washington នៅពេលដែលភាពតានតឹងរវាងសហរដ្ឋអាមេរិក និងចិនកំពុងឡើងកំដៅខ្លាំង។ សារព័ត៌មាន CNN បានរាយការណ៍ថា ក្រុមមន្ត្រីមួយចំនួនរបស់លោក Biden បារម្ភថា ចិនអាចប្រកាសតំបន់គ្មានការហោះហើរលើកោះតៃវ៉ាន់ ក្នុងកិច្ចខិតខំប្រឹងប្រែងដើម្បីបញ្ឈប់ដំណើររបស់លោកស្រី Pelosi ដែលអាចបង្កឲ្យភាពតានតឹងកើនឡើងកាន់តែខ្លាំងនៅក្នុងតំបន់៕
អត្ថបទ៖ សុខមាន