អត្ថបទ៖ គង់ វណ្ណៈ

ភ្នំពេញ៖ លោកសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាលបានអនុញ្ញាតឱ្យលោក Gerardo Penalver Portal អនុរដ្ឋមន្រ្តីទី១ នៃក្រសួងការបទេសគុយបា ចូលជួបសម្តែងការគួរសម និងពិភាក្សាការងារអំពីកិច្ចសហប្រតិបត្តិការលើវិស័យសុខាភិបាលរវាងប្រទេសទាំងពីរ។ 

រដ្ឋមន្រ្តី ក៏បានថ្លែងអំណរគុណយ៉ាងជ្រាលជ្រៅចំពោះទំនាក់ទំនងជាប្រពៃណីកម្ពុជា-គុយបា ជាពិសេសនាទស្សវត្សរ៍ឆ្នាំ៨០ បន្ទាប់ពីកម្ពុជាទើបងើបពីរបបប្រល័យពូជសាសន៍ គុយបាបានបញ្ជូនក្រុមគ្រូពេទ្យ ចំនួនប្រមាណពី ២០ ទៅ៣០នាក់ មកជួយដល់អតីតមន្ទីរពេទ្យ ៧មករា ពីឆ្នាំ១៩៨០ ដល់ឆ្នាំ១៩៨៩ ក្នុងការផ្តល់សេវាពិនិត្យ ព្យាបាលថែទាំជំងឺផ្នែកវេជ្ជសាស្រ្តទូទៅ ផ្នែក វះកាត់ ផ្នែកជំងឺកុមារ ផ្នែករោគស្រ្តីនិងសម្ភព ផ្នែកត្រចៀក ច្រមុះ បំពង់ក និងផ្នែកចក្ខុរោគ ព្រមទាំងជួយបង្ហាត់បង្រៀនដល់ក្រុមគ្រូពេទ្យកម្ពុជាក្នុងកាលៈទេសៈ ដែលកម្ពុជាទើបរួចផុតពីរបបប្រល័យពូជសាសន៍។ 

ជាមួយគ្នានេះគុយបាបានផ្តល់អាហារូបករណ៍ដល់និស្សិត និងគ្រូពេទ្យកម្ពុជាទៅសិក្សាផ្នែកវេជ្ជបណ្ឌិតឯកទេសនានា វេជ្ជបណ្ឌិត ឱសថការី ផ្នែកមន្ទីរពិសោធន៍ ផ្នែករូបភាពវេជ្ជសាស្រ្ត និងគិលានុបដ្ឋាក-យិកា នៅប្រទេសគុយបា ចំនួន ៣៦នាក់។ 

រដ្ឋមន្រ្តី ម៉ម ប៊ុនហេង ក៏បានគូសរំលេចថា បន្ទាប់ពីកម្ពុជាបានបង្រួបបង្រួមជាតិ និងកសាងបានសន្តិភាពទាំងស្រុងតាមរយៈនយោបាយឈ្នះ-ឈ្នះ របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា កិច្ចសហប្រតិបត្តិការកម្ពុជា-គុយបា លើវិស័យសុខាភិបាល ក៏នៅតែបន្តតាមរយៈការចុះកិច្ចព្រមព្រៀង នាឆ្នាំ២០០១ និងបានបញ្ជូនក្រុមគ្រូពេទ្យមកជួយផ្តល់សេវាពិនិត្យ ព្យាបាល ព្រមទាំងចែករំលែកចំណេះដឹង ជំនាញ និងបទពិសោធ​ ដល់គ្រូពេទ្យកម្ពុជានៅខេត្តព្រះវិហារ ខេត្តកំពង់ចាម និងខេត្តមណ្ឌលគិរី នាឆ្នាំ២០០១ ដល់ឆ្នាំ២០០២។ 

ក្នុងឱកាសនេះ លោកអនុរដ្ឋមន្រ្តីទី១ នៃក្រសួងការបទេសគុយបា សម្តែងនូវការកោតសរសើរ និងអបអរសាទរដល់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងក្រសួងសុខាភិបាល ចំពោះជោគជ័យក្នុងការប្រយុទ្ធនឹងជំងឺកូវីដ-១៩ ដែលអាចឱ្យកម្ពុជាបើកដំណើរការឡើងវិញទាំងស្រុងសេដ្ឋកិច្ច-សង្គម។ 

ទន្ទឹមនឹងនេះលោក​ក៏បានថ្លែងអំណរគុណចំពោះរាជរដ្ឋាភិបាលកម្ពុជា ដែលបានចាក់វ៉ាក់សាំងកូវីដ-១៩ ជូនដល់មន្រ្តីការទូតគុយបាប្រចាំកម្ពុជាទាំងអស់ដោយឥតគិតថ្លៃ។ 

លោកអនុរដ្ឋមន្រ្តីទី១ ក៏បានសម្តែងការកោតសរសើរដល់មន្រ្តីជំនាញរបស់ក្រសួងសុខាភិបាលទាំងពីរ ដែលបាននិងកំពុងពិភក្សាគ្នាយ៉ាងសកម្មតាមរយៈស្ថានទូតគុយបា ប្រចាំកម្ពុជា ក្នុងការបញ្ចប់អនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការវិស័យសុខាភិបាលកម្ពុជា-គុយបា ដែលគ្រោងនឹងចុះហត្ថលេខាក្នុងកំលុងពេលទស្សនកិច្ចផ្លូវការរបស់ សម្តេចតេជោ ហ៊ុន សែន នាយករដ្ឋមន្រ្តី នៃ​កម្ពុជា នៅសាធារណរដ្ឋគុយបា នាពេលដ៏ខ្លីខាងមុខ។ 

ជាការឆ្លើយតប លោករដ្ឋមន្រ្តី បានសម្តែងនូវសេចក្តីសង្ឃឹមយ៉ាងមុតមាំថា ក្រោមអនុស្សរណៈនៃការយោគយល់គ្នាថ្មីនេះ កិច្ចសហប្រតិបត្តិការលើវិស័យសុខាភិបាល រវាងប្រទេសទាំងពីរកាន់តែត្រូវបានពង្រឹង និងពង្រីក ដែលជាការរួមចំណែកលើកកម្ពស់សុខុមាលភាព សុខភាពរបស់ប្រជាជន នៃប្រទេសទាំងពីរ ហើយចំណងសាមគ្គីភាព មិត្តភាព និងកិច្ចសហប្រតិបត្តិការកម្ពុជា-គុយបា កាន់តែរឹងមាំ៕