ព្រះសង្ឃ និងពុទ្ធបរិស័ទជិតឆ្ងាយធ្វើបុណ្យកឋិនទានសាមគ្គីដង្ហែទៅកាន់វត្តល្ងើននៅ ឃុំដូនសរ ស្រុកស្វាយជ្រំ
- Admin Page
- November 01, 2022
- Views 306
ព្រះសង្ឃ និងពុទ្ធបរិស័ទជិតឆ្ងាយធ្វើបុណ្យកឋិនទានសាមគ្គីដង្ហែទៅកាន់វត្តល្ងើននៅ ឃុំដូនសរ ស្រុកស្វាយជ្រំ
ខេត្តស្វាយរៀង៖ ព្រឹកថ្ងៃទី៣១ ខែតុលា ឆ្នាំ២០២២នេះ ព្រះវិសុទ្ធញ្ញាណ មុំ សយ ព្រះរាជាគណៈថ្នាក់កិត្តិយស និងជាព្រះមេគណខេត្តស្វាយរៀង ព្រះសង្ឃ រួមនិងពុទ្ធបរិស័ទទាំងក្នុង និងក្រៅខេត្ត បានមូលមតិគ្នាជាឯកច្ឆ័ន្ទផ្ដួចផ្ដើមធ្វើបុណ្យកឋិនទានសាមគ្គីយ៉ាងធំមួយដើម្បីវេរបច្ច័យស្បង់ជីវរទៅប្រគេនព្រះសង្ឃគង់ចាំព្រះវស្សាអស់មួយត្រីមាសក្នុងទីអារាមវត្តល្ងើន ស្ថិតនៅឃុំដូនសរ ស្រុកស្វាយជ្រំ ខេត្តស្វាយរៀង។
បន្ទាប់ពីអង្គកឋិនទានប្រទក្សិណជុំវិញព្រះវិហារ និងដាឆ្លងសទ្ធាបុណ្យធ្វើតាមកន្លងប្រពៃណីព្រះពុទ្ធសាសនាជាបន្តបន្ទាប់រួចមក ព្រះវិសុទ្ធញ្ញាណ មុំ សយ ព្រះរាជាគណៈថ្នាក់កិត្តិយស និងជាព្រះមេគណខេត្តស្វាយរៀង បានមានសង្ឃដីកាឲ្យដឹងថា÷
បុណ្យកឋិនទាន គឺជាបុណ្យមួយដែលបានកំណត់យ៉ាងច្បាស់លាស់ ក្នុងចន្លោះ ២៩ ថ្ងៃ គឺចាប់តាំងពីថ្ងៃ ១រោច ខែអស្សុជរហូតដល់ថ្ងៃ ១៥កើត ខែកត្តិក ដោយក្នុងមួយឆ្នាំ វត្តមួយធ្វើបានតែម្តង មិនថា អង្គឋិនតិចឬច្រើនឲ្យតែចូលក្នុងថ្ងៃតែមួយ ។
ព្រះគ្រូវិសុទ្ធញ្ញាណ មុំ សយ ព្រះរាជាគណៈថ្នាក់កិត្តិយស និងជាព្រះមេគណខេត្ត បានមានថេរះដីកា ថ្លែងអំណរគុណយ៉ាងជ្រាលជ្រៅចំពោះព្រះសង្ឃគ្រប់ព្រះអង្គ និងពុទ្ធបរិស័ទគ្រប់ទិសទីដែលបានមូលមតិគ្នាជាឯកច្ឆ័ន្ទផ្តួចផ្តើមធ្វើបុណ្យកឋិនទានដើម្បីដង្ហែមកកាន់
វត្តល្ងើន នៅពេលនេះដោយទឹកចិត្តជ្រះថ្លាក្រៃលែង។
ព្រះគ្រូវិសុទ្ធញ្ញាណ មុំ សយ បានមានសង្ឃដីកាបន្តផងដែរថា ការដែលយើងមានឱកាសបានធ្វើបុណ្យជួបជុំគ្នានៅពេលនេះក៏ដោយសារតែប្រទេសជាតិយើងមានសន្តិភាពពេញផ្ទៃប្រទេសក្រោមការដឹកនាំរបស់រាជរដ្ឋាភិបាលដែលមានសម្ដេចអគ្គមហាសេនាបតីតេជោហ៊ុនសែនជានាយករដ្ឋមន្ត្រី។ ជាចុងបញ្ចប់ ព្រះគ្រូវិសុទ្ធញ្ញាណ មុំ សយ ក៏បានប្រគេនពរ ឯកឧត្តម លោកជំទាវ និងជូនពរដល់ព្រះសង្ឃគ្រប់អង្គ និងពុទ្ធបរិស័ទទាំងអស់ដែលបានចូលរួមធ្វើបុណ្យទាំងអស់ នឹង បានបច្ច័យសំរាប់ ជូសជុលដំបូល ព្រះវិហ៊ារក្នុងវត្ត ល្ងើនឱ្យទទួលផលបុណ្យពីអង្គកឋិនទាននេះគ្រប់គ្នាកុំបីអាក់ខានឡើយ។
(សូមបញ្ជាក់ផងដែរថា)ចំពោះបច្ច័យដែលបានមកពីបុណ្យអង្គកឋិនទានសាមគ្គីនៅពេលនេះមានចំនួនជាង ៣០លានរៀល និងត្រៃយ៍ស្បង់ជីវរមួយចំនួនសម្រាប់ប្រគេនព្រះភិក្ខុសង្ឃ និងសម្រាប់កសាងសមិទ្ធិផលមួយចំនួននៅក្នុងវត្តល្ងើន ដើម្បីជាប្រយោជន៍ដល់វិស័យព្រះពុទ្ធសាសនា៕